XELATÊ KOVARA VATEYÎ AMEYÎ DAYENE
Ugur SERMÎYAN
XELATÊ KOVARA VATEYÎ AMEYÎ DAYENE
Redaksîyonê Kovara Vateyî, seba teşwîqkerdişê nuştox û şaîranê kirmanckî (zazakî) û averberdişê kirmanckî reya verêne serra 2017î de musabeqayêk bi nameyê “Musabeqaya Hîkaye û Şîîran ya Kovara Vateyî” organîze kerdbî. Semedê şert û mercanê cîya-cîyayan ra, heta 2020î kovare nêeşkîyabî musabeqaya dîyine organîze bikero. Grûba Xebate ya Vateyî emser kombîyayîşê xo yê 33. de 26.02.2020î de musabeqaya hîkaye û şîîran ya kovara Vateyî ya dîyine îlan kerde. Herçiqas redaksîyonê kovare waştêne seba na musabeqaya dîyine merasimêde zaf weş, qerebalix û pirrê çalakîyanê hunerîyan organîze bikero zî, janê (pandemîya) Covid-19î bî sebeb ke redaksîyon nêeşko xelatan merasimêde winasîyî de bido. Coka înan qerar da ke xelatî merasimêde qijkekî de bi beşdarîyêka sînorkerdîye bêrê dayene. Endamê redaksîyonî, verê cû tarîxê dayîşê xelatan sey 20.12.2020î îlan kerdbî. Labelê semedo ke rojanê peyê hewteyî de qedexeyê tebervejîyayîşî esto welat de, no tarîx mecburane bi 18.12.2020î ame vurnayene.
Nê semedî ra; xelatgirewtoxî, çend endam û kedkarê Vateyî 18.12.2020î de Dîyarbekir de buroyê Vateyî de ameyî pêser. Kombîyayîşêko biheyecan û weş bî. Nameyê redaksîyonê kovara Vateyî ser o Mehemed Malmîsanijî qisey kerd û netîceyî eşkera kerdî. Beşe şîîre de Dilo Bargiran bî yewin, Îdris Yazar bî dîyin û Îbrahîmê Xaşxaşe zî bî hîrêyin. Reyna beşê hîkaye de Yaqub Guven bî yewin, Erkan Yildirim û Îrfan Akdag bîyî dîyin, Hesen Polat û Cuma Karakuş zî bîyî hîrêyin. Xelatgirewtoxan ra Îbrahîmê Xaşxaşe û Hesen Polat semedo ke Almanya de ciwîyenê û Yaqub Guven û Dilo Bargiran zî tayê sebebanê tenduristîye ra nêeşkayî beşdarê merasimî bibê. Mehemed Malmîsanijî xelatê xelatgirewtoxanê haziran dayî, heme xelatgirewtoxî pîroz kerdî û wina va “Ewroyî ra tepîya barê şima hîna giran beno. Ma hêvî kenê ke ney ra pey, eleqeyê şima yê seba ziwanê ma hîna bizêdîyo û dewamê xebatanê şima zî bêro.” Xelatgirewtoxan zî, semedo ke na musabeqa organîze kerda, grûb û kovara Vateyî rê sipas kerd. Tereqêde weşî ra tepîya, beşdarî vila bîyî.